ក្នុងកិច្ចប្រជុំ នៅសាលារាជធានីភ្នំពេញ កាលពីព្រឹកថ្ងៃទី១៧ ខែកក្កដា ឆ្នាំ២០១២ លោក អោម ចន ប្រធាននាយកដ្ឋានច្បាប់ វិវាទ និងស្ថិតិ នៃអគ្គនាយកដ្ឋានពន្ធដារ បានឲ្យដឹងថា ការអនុវត្តប្រមូលពន្ធអចលនទ្រព្យ នៅរាជធានីភ្នំពេញឆ្នាំ២០១១ កន្លងមក បានដំណើរការល្អ មានភាពរលូន និងប្រសិទ្ធិ ភាពបង្គួរគួរជាទីមោទន។
ទន្ទឹមនះ លោក ឱម ចន បានលើកឡើងថា កាលពីឆ្នាំ២០១១ ក៏នៅមានការតវ៉ាពីម្ចាស់អចលនទ្រព្យនូវតម្លៃអចលនទ្រព្យមួយចំនួនតូចផងនោះ ទើបអគ្គនាយកដ្ឋានពន្ធដារ បានធ្វើការកែសម្រួលតម្លៃអចលនទ្រព្យឡើងវិញ ឲ្យបានសមស្រប នៅតាមបណ្តាទីតាំងមួយចំនួន ដូចខាងក្រោម៖
- តំបន់ I (ខណ្ឌដូនពេញ ខណ្ឌ ៧ មករា ខណ្ឌចំការមន និងខណ្ឌទួលគោក): ប្រភេទ១ មានតម្លៃ ៧៥០ ដុល្លារ, ១.០០០ ដុល្លារ និង ១.៥០០ ដុល្លារ ក្នុងមួយម៉ែត្រការ៉េ និងប្រភេទ២ មានតម្លៃ ៥០០ ដុល្លារ, ៧៥០ ដុល្លារ និង១.០០០ ដុល្លារ ក្នុងមួយម៉ែត្រការ៉េ។
- តំបន់ II (ខណ្ឌឫស្សីកែវ ខណ្ឌមានជ័យ ខណ្ឌដង្កោ ខណ្ឌសែនសុខ និងខណ្ឌពោធិ៍សែនជ័យ) :ប្រភេទ១ តម្លៃ ១.០០០ ដុល្លារ /ម២ ប្រភេទ២ តម្លៃ ៧៥០ ដុល្លារ /ម២ ប្រភេទ៣ តម្លៃ ៥០០ ដុល្លារ /ម២ ប្រភេទ៤ តម្លៃ ៣៥០ ដុល្លារ /ម២ ប្រភេទ៥ តម្លៃ ៣០០ ដុល្លារ /ម២ ប្រភេទ៦ តម្លៃ ២០០ ដុល្លារ /ម២ ប្រភេទ៣ តម្លៃ ១០០ ដុល្លារ /ម២ ប្រភេទ៨ តម្លៃ ៧៥ ដុល្លារ /ម២ ប្រភេទ៩ តម្លៃ ៥០ ដុល្លារ /ម២ និងប្រភេទ ១០ គឺជាអចលនទ្រព្យ ដែលស្ថិតនៅតាមភូមិជាយក្រុង ដែលមានតម្លៃចាប់ពី ២ ដុល្លារ រហូត ដល់ ១៥០ ដុល្លារ ក្នុងមួយម៉ែត្រការ៉េ នៅតាមស្ថានភាពជាក់ស្តែង។
ចំណែកលោក ឃួង ស្រេង អភិបាលរងរាជធានីភ្នំពេញ ដែលបានដឹកនាំអង្គប្រជុំជាមួយមន្ត្រីជំនាញពាក់ព័ន្ធ ដើម្បីពិភាក្សាវាយតម្លៃឡើងវិញ អំពីតម្លៃអចលនទ្រព្យ បានគូសបញ្ជាក់ថា ការបង់ពន្ធលើអចលនទ្រព្យ គឺជាកាតព្វកិច្ចរបស់ប្រជាពលរដ្ឋ ដែលកាលពីឆ្នាំ ២០១១ កន្លងមកមកនេះ អាជ្ញាធរមូលដ្ឋានគ្រប់លំដាប់ថ្នាក់ បានសហការជាមួយអង្គភាពពន្ធដារ ពិសេស ការចូលរួមពីប្រជាពលរដ្ឋបានធ្វើឲ្យ ការប្រមូលពន្ធលើអចលនទ្រព្យ ប្រព្រឹត្តទៅបានយ៉ាងគាប់ប្រសើរ។
លោកអភិបាលរង បានបន្តទៀតថា បន្ទាប់ពីមានការឯកភាពចំពោះតម្លៃពន្ធអចលនទ្រព្យ ដែលបានកែសម្រួលឡើងវិញ សម្រាប់ឆ្នាំ២០១២ ពីក្រសួងសេដ្ឋកិច្ច និងហិរញ្ញវត្ថុហើយនោះ អាជ្ញាធរមូលដ្ឋាន ដែលជាអ្នកអនុវត្តផ្ទាល់ទាំងអស់ត្រូវធ្វើការផ្សព្វផ្សាយឲ្យបានទូលំទូលាយ ជូនដល់ប្រជាពលរដ្ឋ សំខាន់ត្រូវពន្យល់ពួកគាត់ឲ្យបានជ្រួតជ្រាប និងយល់ដឹងពីកាតព្វកិច្ចនៃការបង់ពន្ធនេះ។
ទន្ទឹមនេះ លោកអភិបាលរង បានមានប្រសាសន៍បញ្ជាក់ទៀតថា "កន្លងមកមក ការប្រមូលពន្ធពីប្រជាពលរដ្ឋធម្មតា គឺយើងបានអនុវត្តទៅបានដោយរលូន តែចំពោះគហិបតី និងអ្នកមានដីធំៗវិញ យើងនៅជួប ការលំបាកនៅឡើយ ដូចនេះអាជ្ញាធរត្រូវតែធ្វើលិខិតអញ្ជើញពួកគាត់ទាំងនោះ ឲ្យមកបំពេញកាតព្វកិច្ចបង់ពន្ធ ជូនរដ្ឋដូចប្រជាជនទូទៅផងដែរ។ ក្នុងករណីបានអញ្ជើញពួកគាត់ចំនួនបីលើករួចហើយ ពួកគាត់នៅតែមិនមក បំពេញកាតព្វកិច្ចនេះទៀត អាជ្ញាធរមូលដ្ឋានត្រូវធ្វើសេចក្តីរាយការណ៍ជាបន្ទាន់មកសាលារាជធានីភ្នំពេញ ដើម្បីឲ្យ សាលារាជធានីភ្នំពេញ បានបន្តសុំគោលការណ៍ដឹកនាំពី ក្រសួងមហាផ្ទៃ ពិសេស សម្តេចតេជោនាយករដ្ឋមន្ត្រី ដើម្បីចាត់វិធានការណ៍តាមផ្លូវច្បាប់"៕
