លោកទេសរដ្ឋមន្ត្រី បានបញ្ជាក់ថា នៅក្នុងកិច្ចប្រជុំ នៃអង្គសន្និសីទកំពូលនោះ បានវាយតម្លៃបំផុតទៅលើជោគជ័យ នៃការអភិវឌ្ឍតំបន់ឆ្នេរប្រកបដោយចីរភាព និងមានកិច្ចការការពារបរិស្ថាន បានល្អប្រសើរ ដោយមានការចូលរួមពីអាជ្ញាធរថ្នាក់ក្រោមជាតិ និងការចូលរួមសហគមន៍ ក្នុងការគ្រប់គ្រងបរិស្ថាន និងអភិវឌ្ឍន៍សេដ្ឋកិច្ច រួមទាំងអ្នកវិនិយោគ និងកិច្ចការពារតំបន់ឆ្នេរ ដោយមានការចូលរួមពីអ្នកនេសាទ និងអ្នកនាវាចរណ៍។
លោក ម៉ុក ម៉ារ៉េត បានបញ្ជាក់ទៀតថា ការអភិវឌ្ឍដោយចីរភាពសមុទ្រអាស៊ីបូព៌ានេះ បានផ្តោតទៅលើសេដ្ឋកិច្ចពណ៌ខៀវ “សមុទ្រ” ពីព្រោះសមុទ្រជាប្រភពនូវធនធានមហាសាល សម្រាប់អភិវឌ្ឍន៍សេដ្ឋកិច្ច នៃប្រទេសនីមួយៗ ក៏ដូចជានិរន្តរភាពបរិស្ថានផងដែរ។ ដូច្នេះត្រូវតែធ្វើយ៉ាងណា ធានានូវនិរន្តរភាពបរិស្ថានតំបន់សមុទ្រ ក៏ដូចជា ជីវសាស្ដ្របរិស្ថានសមុទ្រផងដែរ។
លោក ម៉ុក ម៉ារ៉េត បានបញ្ជាក់បន្ថែមថា នៅក្នុងសន្និសីទនោះ បានវាយតម្លៃលើការអភិវឌ្ឍដោយជោគជ័យ នៃការដឹកនាំរបស់រដ្ឋាភិបាលប្រទេសនីមួយៗ និងការចូលរួមជ្រោមជ្រែងពីអង្គការអន្តរជាតិយ៉ាងសកម្ម ដោយរៀបចំជាមណ្ឌលពិសោធន៍គំរូ នៃការអភិវឌ្ឍដោយចីរភាព។
លោកបញ្ជាក់ថា “ក្នុងរាជរដ្ឋាភិបាលរបស់យើង ក្រោមការដឹកនាំដ៏ឈ្លាសវៃ ប៉ិនប្រសព្វ ភ្លឺស្វាងពោរពេញដោយគតិបណ្ឌិតរបស់សម្ដេចតេជោ គឺតាំងពីឆ្នាំ១៩៩៤ យើងបានចូលជាសមាជិក នៃអង្គការដៃគូគ្រប់គ្រងបរិស្ថានតំបន់ឆ្នេរ និងសមុទ្រ”។
លោកទេសរដ្ឋមន្ត្រីបានបន្ថែមថា អង្គការនេះ បានជ្រើសរើសយកឆ្នេរសមុទ្រខេត្តព្រះសីហនុ ធ្វើជាឆ្នេរ និងសមុទ្រគំរូ នេះជាជោគជ័យរបស់កម្ពុជា ដែលបានរៀបចំតាំងពីឆ្នាំ១៩៩៤ មក ហើយមិនមែនជាគំរូតែខេត្តព្រះសីហនុទេ គឺគំរូបន្តបន្ទាប់ដល់ទៅបីខេត្តទៀត គឺឆ្នេរសមុទ្រខេត្តកំពត, កែប និងកោះកុង ដែលត្រូវបានអន្តរជាតិទទួលស្គាល់ថា ឆ្នេររបស់កម្ពុជា ជាឆ្នេរល្អជាងគេលើពិភពលោក។ នេះដោយសារតែកិច្ចការពារបរិស្ថានបានល្អ ក្រោមការដឹកនាំរបស់រាជរដ្ឋាភិបាល ដោយថែរក្សាកុំឲ្យមានការខូចខាតតំបន់ ក្រោមពាក្យស្លោក “ផ្កាយរះពីទិសនារតី” បានស្របទៅការអភិវឌ្ឍសេដ្ឋកិច្ចពណ៌ខៀវ។
លោក ម៉ុក ម៉ារ៉េត បានឲ្យដឹងថា អង្គការដៃគូគ្រប់គ្រងបរិស្ថានតំបន់ឆ្នេរ និងសមុទ្រ ជ្រើសរើសយកខេត្តបីទៀតរបស់កម្ពុជា មានខេត្តកែប កំពត និងកោះកុង ជាឆ្នេរអភិវឌ្ឍន៍ប្រកបដោយចីរភាពសេដ្ឋកិច្ចពណ៌ខៀវ ហើយនៅបណ្ដាប្រទេសផ្សេងៗទៀត ក៏មានការពង្រីកដូចកម្ពុជាដែរ ដែលជាការដាក់ទិសនៃអង្គសន្និសីទ ក្នុងការអភវឌ្ឍន៍ដោយចីរភាព រយៈពេលឆ្នាំ៥ របស់ប្រទេសនីមួយៗ នៃសេដ្ឋកិច្ចពណ៌ខៀវ៕
No comments:
Post a Comment