ពានរង្វាន់នេះត្រូវបានផ្ដល់ជូនជារៀងរាល់ឆ្នាំដល់ក្រុមហ៊ុនទាំងឡាយ ដែលបង្ហាញឲ្យឃើញនូវការប្ដេជ្ញាចិត្ត ក្នុងការអនុវត្តការគ្រប់គ្រង ធនធានមនុស្ស និងយុទ្ធសាស្ត្រស្លាកសញ្ញាប្រកបដោយវិជ្ជាជីវៈ។ ក្រុមហ៊ុនត្រូវបានវិនិច្ឆ័យដោយផ្អែកលើលទ្ធភាពរបស់ខ្លួន ក្នុងការទាក់ទាញ និងរក្សាបុគ្គលិក ឲ្យនៅបម្រើការងារ។ ជ័យលាភីផ្សេងទៀត រួមមានសាខានិងក្រុមហ៊ុន សម្ព័ន្ធ របស់សាជីវកម្ម ធំៗ ដូចជា Google, Unilever, Microsoft, KPMG, P&G, Hutchison និង Huawei។
ប្រធានធនធានមនុស្សនៃក្រុមហ៊ុន Cellcard លោកស្រី Nicky Enriquez មានប្រសាសន៍ថា “នេះជាសមិទ្ធផល ដ៏ធំធេង ដែលក្រុមហ៊ុន យើងត្រូវបានទទួលស្គាល់ថា ជានិយោជក ដែលមានមនុស្សជាច្រើន ចង់បម្រើការឲ្យ។ Cellcard គឺជាក្រុមហ៊ុនទូរស័ព្ទចល័តមួយ ដែលប្រតិបត្តិការ យូរជាងគេបំផុត នៅកម្ពុជា និងជានិយោជកធំជាងគេបំផុតមួយក្នុងចំណោមនិយោជកធំបំផុតជាច្រើននៅកម្ពុជា។ ពានរង្វាន់នេះគឺជាការបញ្ជាក់អំពីការប្ដេជ្ញាចិត្តនិងកិច្ចប្រឹងប្រែងរបស់យើងក្នុងការបង្កើតការងារ និងអភិវឌ្ឍន៍ជំនាញនៅក្នុងប្រទេស”។
យោងតាមវិទ្យាស្ថាន Employer Branding Institute ដែលរៀបចំពានរង្វាន់នេះ ចៅក្រមមួយក្រុមមកពី ប្រទេសខុសៗគ្នា នៅក្នុងតំបន់អាស៊ី ជាអ្នកជ្រើសរើស ក្រុមហ៊ុននានា មកពីតំបន់អាស៊ី។ បន្ទាប់មក ក្រុមហ៊ុនទាំងនោះត្រូវបានអញ្ជើញឲ្យប្រឡងប្រជែងគ្នាសម្រាប់ពានរង្វាន់ជាច្រើន ដែលរាប់តាំងពីពានរង្វាន់និយោជកល្អបំផុតរហូតដល់ពានរង្វាន់ភាពជាអ្នកដឹកនាំរបស់ស្ត្រីនៅក្នុងការងារ។
លោកស្រី Enriquez មានប្រសាសន៍បន្ថែមថា “ជាកិត្តិយសខ្លាំងណាស់ ដែលក្រុមហ៊ុនយើង ត្រូវបានគេពិចារណារួម ជាមួយនឹងក្រុមហ៊ុនធំៗ បំផុត នៅលើពិភពលោក។ នេះបង្ហាញអំពីភាពប្រកបដោយវិជ្ជាជីវៈ និងការប្រកាន់ខ្ជាប់នូវស្តង់ដារខ្ពស់បំផុតនៅក្នុងការគ្រប់គ្រងបុគ្គលិក ក៏ដូចជាប្រតិបត្តិការធុរកិច្ចទូទៅ”។
ពិធីប្រគល់ពានរង្វាន់ដែលបានធ្វើឡើងនៅឯសណ្ឋាគារ Park Royal នៅប្រទេសសិង្ហបុរី កាលពីសប្ដាហ៍កន្លងទៅ មានការចូលរួម ពីសំណាក់ ប្រធានក្រុមហ៊ុន និងប្រធានផ្នែក ធនធានមនុស្ស មកពីប្រទេសនានាទូទាំងតំបន់។ Cellcard គឺជាបណ្ដាញទូរគមនាគមន៍ ឈានមុខគេ នៅក្នុង ប្រទេសកម្ពុជា។ ក្រុមហ៊ុន Cellcard ត្រូវបានបង្កើតឡើងនៅក្នុងឆ្នាំ១៩៩៦ និងបានផ្ដល់សេវាទូរស័ព្ទចល័ត ដល់ប្រជាពលរដ្ឋកម្ពុជា រាប់លាននាក់ ក្នុងរយៈពេលជាងមួយទសវត្សរ៍កន្លះកន្លងមក។
បច្ចុប្បន្ន ក្រុមហ៊ុនមានបុគ្គលិកជាង ៧០០នាក់ដែលបម្រើការងារនៅក្នុងការិយាល័យជាច្រើនកន្លែងនៅទូទាំងប្រទេសកម្ពុជា និងមានអតិថិជន ប្រមាណ ៣លាននាក់ ដែលមានបណ្ដាញសេវាទូរស័ព្ទចល័តគ្របដណ្ដប់ទូទាំងប្រទេស។ ទោះស្ថិតក្នុងទីផ្សារ ទូរគមនាគមន៍ ដែលវិវឌ្ឍ ឥតឈប់ឈរក្ដី ក្រុមហ៊ុន Cellcard នៅតែបន្ដផ្ដល់សេវាជូនប្រទេសកម្ពុជា ក៏ដូចជាប្រជាជនកម្ពុជាប្រកបដោយការប្ដេជ្ញាចិត្តខ្ពស់៕
No comments:
Post a Comment